«panorama.am», 19.07.2011

Լրագրողների նկատմամբ բռնության երկու դեպք 2011թի 2-րդ կիսամյակում

2011թ-ի առաջին կիսամյակում լրագրողների դեմ բռնության դեպք չի արձանագրվել, իսկ ահա երկրորդ կիսամյակում ֆիզիկական բռնության երկու դեպք ենք ունեցել` «Զինվոր» հկ-ների համագործակցության իրավապաշտպան համակարգող խորհրդի նախագահ Մարգարիտա Խաչատրյանի հարձակումը «Հրապարակ» օրաթերթի խմբագրության վրա, որի արդյունքում մարմնական վնասվածք էր ստացել նաև գլխավոր խմբագիր Արմինե Օհանյանը և «Արարատ» ֆուտբոլային ակումբի մարզիչ Արկադի Անդրեասյանի բռնությունը ֆոտոլրագրող Աշոտ Առուշանյանի նկատմամբ:

Այս մասին այսօրվա ասուլիսում հայտարարեց Խոսքի ազատության պաշտպանության կոմիտեի նախագահ Աշոտ Մելիքյանը` ներկայացնելով Հայաստանում խոսքի ազատության վիճակի և լրագրողների ու ԶԼՄ-ների իրավունքների խախտումների մասին ԽԱՊԿ 2011թ. երկրորդ եռամսյակային զեկույցը:
«Ցավոք պետք է փաստեմ, որ Հայաստանում լրագրողներն աշխատում են բավականին բարդ պայմաններում, որի մասին, օրինակ, վկայում են դատական հայցերը նրանց դեմ»,- նշեց բանախոսը:

Որպես օրինակ հիշեցրեց բոլոր այն դատական գործերը` «Երկիր», «Ժամանակ» և այլ ԶԼՄ-ների դեմ, որոնց ետևում կանգնած են հիմնականում քաղաքական գործիչներ: Ու այս ամենում ընդամենը մեկ դեպքում դատարանը մերժեց ԱԺ պատգամավոր Տիգրան Արզաքանցյանի հայցն ընդդեմ «Իրավունք» թերթի. «Սա բացառություն է և լավ կլիներ, որ լիներ օրինաչափություն»:

Առաջին կիսամյակի համեմատ նվազել են ճնշումները ԶԼՄ-ների և դրան աշխատակիցների նկատմամբ. եթե տարվա առաջին երեք ամիսների ընթացքում դրանց թիվը կազմել էր 15 դեպք, ապա երկրորդ կիսամյակում ունեցել ենք ընդամենը 6 դեպք:

Զեկույցի համաձայն, խախտում է արձանագրվել նաև տեղեկություններ ստանալու և տարածելու իմաստով` երկրորդ կիսամյակում նման երկու դեպք է արձանագրվել:

Ընդհանուր առմամբ, նշեց Ա.Մելիքյանը, զեկույցում ներկայացված ժամանակահատվածը լրագրողների ու ԶԼՄ-ների իրավունքների խախտումների առումով կարելի է համարել միջին լարվածության:

Աղբյուր` Panorama.am

Տես` http://www.panorama.am/am/law/2011/07/19/journalists/

Share