Արխիվ | Հոդվածներ RSS feed for this section

Քայլեր՝ ընդդեմ «ֆեյք» լուրերի. ինչ են առաջարկում լրագրողները

Հետհեղափոխական ժամանակաշրջանում կեղծ կամ, ինչպես ասում են, ֆեյք (fake) լուրերի մասին չեն խոսում միայն ծույլերը։ Դրանք տարածվում են վիրուսի նման, գայթակղիչ վերնագրերով։ Այսօր արդեն գործում են, այսպես կոչված, «ֆեյքերի ֆաբրիկաներ»։

Կարդալ ավելին

Ինչ է թաքցնում քաղաքապետարանը լրագրողից. օրենսդրական արգելքներ՝ մեդիայի գործունեության համար

Երբ փետրվարի 13-ին Երևանի ավագանու «Երկիր ծիրանի» խմբակցության անդամների ձեռամբ քաղաքապետարանում հայտնվեցին Նուբարաշենի բնակելի տարածքում բաց հոսող կոյուղաջրերի նմուշները, իսկ ավելի ուշ նույն խմբակցության ջանքերով լրագրողներն ականատես եղան այս մարմնում տիրող ամենաթողությանը, Երևանի արդեն նախկին քաղաքապետ Տարոն Մարգարյանը որոշեց այս ամենը «կարգավորել»։ Փոփոխություններ և լրացումներ կատարվեցին «Երևան քաղաքում տեղական ինքնակառավարման մասին» ՀՀ օրենքում։ Արդարադատության նախարար Դավիթ Հարությունյանի դիրքորոշումը, թե քաղաքապետարանի նիստերը պետք է լինեն բաց ու թափանցիկ,  չխանգարեց, որ խորհրդարանը հավանություն տար Տարոն Մարգարյանի և նրա շրջապատի նախաձեռնությանը՝ արգելել լրագրողների ազատ մուտքը քաղաքապետարան:

Կարդալ ավելին

Փակ դռներ՝ ԶԼՄ-ների համար. տեղեկատվության ազատության երաշխիքները պետք է ապահովվեն օրենքով

Նախկին կառավարությունը Սերժ Սարգսյանի վարչապետությանը պատրաստվելիս փետրվարի 1-ին հավանություն տվեց «Կառավարության կառուցվածքի և գործունեության մասին» ՀՀ օրենքի նախագծին։ Լրատվամիջոցներին օրենսդրական փոփոխությունների միջոցով կաշկանդելու, նրանց ազատությունն անհիմն սահմանափակելու նախաձեռնությունը հաջողեց, և ԱԺ-ում մարտի 23-ին ընդունվեց։ Այսպիսով՝ ըստ օրենքի, կառավարության նիստերը պետք է լինեն դռնփակ, նախարարներին արգելվում է առանց վարչապետի թույլտվության տեղեկատվություն հրապարակել նիստերում ընդգրկված որեւէ հարցի մասին։

Մինչ օրենքի ընդունումը, կառավարությունում հավատարմագրված լրագրողները նիստերին հետևում էին շենքում հատկացված հատուկ սենյակից՝ ուղիղ հեռարձակմամբ, իսկ նիստից հետո հնարավորություն էին ունենում հարցեր ուղղել նախարարներին։ Օրենքի ընդունումով ԶԼՄ-ների ներկայացուցիչները զրկվեցին այդ հնարավորությունից։ 

Կարդալ ավելին

Անվտանգությո՞ւն, թե՞ շղարշ կոռուպցիայի համար

Երկրի առաջին 3 դեմքերի գործունեությանը վերաբերող գնումների մասին տեղեկությունները  2017 թվականից պետական գաղտնիք են։ Սա ամրագրվեց 2016 թ. դեկտեմբերին «Գնումների մասին» ՀՀ օրենքում կատարված փոփոխություններով։
Այս խիստ վիճահարույց փոփոխությունները տարեկան պետբյուջեից հատկացվող շուրջ կես միլիարդ դրամի մասին տեղեկությունները դարձրել են անհասանելի թե լրագրողների, թե հասարակության համար։

Կարդալ ավելին

Հեռուստատեսության եւ ռադիոյի հանձնաժողովը խեղաթյուրում է իրականությունը

ՀՌՀ-ի մեղադրանքը, թե՝ «առաջ քաշելով փոքր մարզային մուլտիպլեքսների գաղափարը, ԽԱՊԿ-ը ցանկանում է հավերժացնել պետական մուլտիպլեքսի մենաշնորհը»՝ պարզունակ զրպարտություն է։ Ռուսներն այս պարագայում ասում են. «с больной головы на здоровую»: Ինքներդ ձեր լծակներով հանդերձ չեք կարողանում կարգավորել այլընտրանքային մուլտիպլեքսի հարցը, ԽԱ՞ՊԿ-ն է մեղավոր։ Գոյություն ունի ԱԺ ներկայացված մի օրինագիծ, որով մենք՝ լրագրողական կազմակերպություններս, առաջարկում ենք հնարավորություն տալ ստեղծելու և՛ համապետական, և՛ մեկ կամ մի քանի մարզեր, և՛ մեկ կամ մի քանի համայնքներ ընդգրկող մասնավոր մուլտիպլեքսներ։ Իսկ պետական մուլտիպլեքսի մենաշնորհի հաղթահարման անհրաժեշտության ու դրա հնարավորությունների մասին բազմիցս ենք հրապարակայնորեն խոսել ու գրել։ Վրացական փորձին էլ անդրադարձել ենք, որպեսզի ցույց տանք, որ հարևան երկրում հեռարձակման թվայնացման արդյունքում չտուժեց ոչ մի հեռուստաընկերություն, նույնիսկ մարզերի ամենափոքր կայանները «մուլտիպլեքսավորվեցին», որովհետև օրենքը ճկուն է, քաղաքական որոշումներն էլ՝ առողջ։ Նույնը չես ասի Հայաստանի մասին. մարզերում գործող 10-ից ավել հեռուստաընկերություններ արատավոր քաղաքականության հետևանքով դուրս մնացին թվայնացման գործընթացից և հայտնվեցին ծայրահեղ ծանր վիճակում։ Վրաստանում մեկ պետական մուլտիպլեքսին զուգահեռ ստեղծվեցին երեք համեմատաբար խոշոր և մարզերում գործող բազմաթիվ մանր մասնավոր մուլտիպլեքսներ։ Հայաստանում բոլոր հեռուստաընկերությունները «խցկված» են մեկ պետական ցանցում։ Եվ ոչ մի մրցակցություն ու բազմազանություն։ Սա՞ է ձեր աշխատանքի արդյունքը։

Կարդալ ավելին

Լրագրողներին արգելել են մտնել կառավարության նիստերի դահլիճ. ո՞րն է պատճառը

Այսօր՝ օգոստոսի 9-ին, կառավարության հերթական նիստի օրը, լրագրողներին արգելվել է բարձրանալ նիստերի դահլիճ։ Նրանք անակնկալի են եկել։ Ավելին՝ լրատվամիջոցների ներկայացուցիչները մեկը մյուսի հետևից ֆեյսբուքով ուղիղ եթեր են դուրս եկել ու մեկնաբանություններ թողել՝ «վարչապետի մամուլի քարտուղար Արման Եղոյանն արգելում է լրագրողներին տեղաշարժվել կառավարության շենքում», «արհեստական խոչընդոտ նոր կառավարության կողմից. բարի գալուստ նոր Հայաստան», «կառավարությունում նոր բարքեր են, նոր արգելքներ, վարչապետի մամուլի քարտուղարը թույլ չի տալիս բարձրանալ նիստերի դահլիճ, ինչո՞ւ, ի՞նչ օրենքով», ոմանք ավելի հեռու են գնացել, ընդհուպ՝ «բա ու՞ր մնաց հեղափոխությունը… .»։ Վարչապետի մամուլի քարտուղար Արման Եղոյանն արգելքի որոշումը պարզաբանել է այսպես. «Անվտանգության ռեժիմը խախտվում է։ Դժվար է վերահսկել՝ ով ուր է գնում շենքում»։

Կարդալ ավելին

Ոչ մի բարեփոխում՝ միայն ստատուս քվոյի պահպանում

Ի հայտ է եկել «Հեռուստատեսության և ռադիոյի մասին» օրենքում կատարված ևս մի փոփոխություն, որն ընդունվել է խիստ գաղտնի պայմաններում: Մեզ համար անհայտ օրենսդրական փոփոխությունը հայտնաբերվեց շատ պատահական։ Երբ օրերս ծանոթանում էինք Հեռուստատեսության և ռադիոյի հանձնաժողովի հայտարարած թվային հեռարձակման մասնավոր ցանցի՝ մուլտիպլեքսի լիցենզավորման մրցույթի պայմաններին, նկատեցինք, որ ի տարբերություն նախորդների, այս անգամ դիմումներն ընդունվելու են ոչ թե 3, այլ 6 ամսվա ընթացքում։ Փորձեցինք պարզել՝ ինչով է դա պայմանավորված։ ՀՌՀ անդամ Արմեն Մկրտչյանն ասաց. «Օրենքի պահանջ է»։ Մենք գտանք օրենքի այդ փոփոխությունը, որը մեզ՝ հեռարձակման ոլորտի խնդիրները մշտապես ուսումնասիրողներիս համար հայտնություն դարձավ։

Կարդալ ավելին

«Թվային ժողովրդավարություն». առավելություններ ու անհանգստություններ

Նոր Հայաստան, նոր իրավիճակ՝ նաև խոսքի ազատության ոլորտում։ Նոր կառավարությունը որդեգրել է «թվային ժողովրդավարության» գործելաոճը։ Բարձրաստիճան պաշտոնյաները՝ կառավարության ղեկավարից սկսած, օնլայն ռեժիմով պատմում են իրենց առօրյա գործունեության ու ընդունված որոշումների մասին՝ հաշվետվու լինելով հասարակությանը, անդրադառնում են հարցերի, որոնք հանրության քննարկումների կիզակետում են։ Կարևորելով այս միտումները՝ որպես խոսքի ազատության զարգացման նոր նախադրյալ, այնուամենայնիվ, նշենք մի քանի անհանգստացնող փաստ։

Կարդալ ավելին

Ներպետական ատյաններն սպառված են. լրագրողին վիրավորողն ու ճնշում գործադրողը մնաց անպատիժ

Վճռաբեկ դատարանը մայիսի 25-ին մերժել է վարույթ ընդունել «Aravot.am» -ի թղթակից Հռիփսիմե Ջեբեջյանի բողոքը՝ վերաքննիչ և առաջին դատական ատյանների ակտերի առնչությամբ, որոնք վերաբերում են լրագրողի մասնագիտական գործունեությունը խոչընդոտելուն։

Հիշեցնենք, 2017 թ. Երևանի ավագանու ընտրությունների օրը՝ մայիսի 14-ին, Երեւանի Մալաթիա-Սեբաստիա համայնքի 7/46 ընտրատեղամասում ճնշում է գործադրվել «Aravot.am» լրատվական կայքի թղթակից Հռիփսիմե Ջեբեջյանի նկատմամբ։ Նա այստեղ արձանագրել էր բաց քվեարկության դեպքեր։ Նկատելով, որ ընտրողները քվեարկելուց հետո քվեաթերթիկը ցույց են տալիս «Հայկական վերածնունդ» կուսակցությունը ներկայացնող հանձնաժողովի անդամ Արայիկ Գեւորգյանին, լրագրողը նրանից հետաքրքրվել է, թե ինչո՞ւ են հատկապես իրեն քվեաթերթիկը ցույց տալիս։ Հարցից Արայիկ Գևորգյանը վրդովվել է. «Շա՞ռ ես անում»։ Նա սկսել է ձեռքերը թափահարել, գոռգոռալ, սպառնալ եւ վիրավորել լրագրողին. «Տղա ըլնեիր, կտայի մռութդ կջարդեի, նոր կիմանայիր, թուլին նայի հլը»։

Հռիփսիմե Ջեբեջյանը դեպքի առնչությամբ դիմել էր ոստիկանության Երեւան քաղաքի վարչության Մալաթիայի բաժին, որտեղ քրեական գործի հարուցումը մերժվել է «հանցագործության դեպքի բացակայություն» տրաֆարետային հիմնավորմամբ։ Այնուհետև լրագրողը դիմել է Երևանի Մալաթիա-Սեբաստիա վարչական շրջանի դատախազություն՝ բողոքարկելով ոստիկանության որոշումը, սակայն Երեւան քաղաքի դատախազից նույնպես ստացել է մերժման որոշում:

Կարդալ ավելին

Ինչո՞ւ ՀՌՀ-ն մասնավոր մուլտիպլեքսորի մրցույթ չի հայտարարում

Հեռուստատեսության և ռադիոյի հանձնաժողովը խախտում է օրենքը. մասնավոր մուլտիպլեքսորի՝ հեռարձակման թվային ցանցի գործունեության լիցենզավորման համար այս տարի մրցույթ չի հայտարարել։

«Հեռուստատեսության և ռադիոյի մասին» ՀՀ օրենքը 2015 թվականից սկսած պարտադրում է՝ մասնավոր մուլտիպլեքսորի գործունեության լիցենզիա ստանալու առաջին մրցույթը հայտարարել մինչև 2016-ի մայիսի 1-ը: Այնուհետև, մրցույթը չկայանալու կամ հաղթող չլինելու դեպքում, դրա հայտարարելուց մեկ տարի հետո պահանջվում է նոր մրցույթ հայտարարել: Օրենքի ընդունմանը հաջորդող 2 տարիներին՝ 2016-ին ու 2017-ին, համապատասխանաբար՝ ապրիլի 30-ին և մայիսի 2-ին  կազմակեպվել են մասնավոր մուլտիպլեքսորի լիցենզավորման մրցույթներ, որոնք  հայատարարվել են չկայացած՝ սահմանված ժամանակահատվածում դիմում չներկայացվելու հիմքով։

Այս տարի, սակայն, թեև մայիսի սկզբին լրացավ նախատեսված ժամկետը, ՀՌՀ-ն առայժմ մրցույթ չի հայտարարել՝ անտեսելով օրենքի պահանջը։ Հանձնաժողովի իրավաբանական և լիցենզավորման վարչության պետ Դավիթ Մարգարյանը ԽԱՊԿ-ի հետ զրույցում հայտնեց, որ հունիսի 6-ի դրությամբ մրցույթի հայտարարման որոշում չկա։ Մինչդեռ՝ նախորդ չկայացած մրցույթից անցել է ոչ թե մեկ տարի, այլ 13 ամիս։

Սա նշանակում է, որ թվային հեռարձակման հանրային ցանցը, այսինքն՝ պետական մուլտիպլեքսորը, առայժմ պահպանելու է մենաշնորհ դիրքը եւ թելադրելու է իր պայմանները ոլորտում։

Կարդալ ավելին