2024 թվականի մայիսի 1-ին ԽԱՊԿ-ը սկսել է երկամյա ծրագիր, որը վերջին տարիներին «Հանուն ժողովրդավարության ազգային հիմնադրամ»-ի (National Endowment for Democracy) աջակցությամբ իրականացվող գործունեության տրամաբանական շարունակությունն է։ Մասնավորապես՝ նախատեսվում է մշակել Հայաստանի մեդիա օրենսդրության բարեփոխումների հայեցակարգ, որում ամրագրված սկզբունքների հիման վրա կմշակվեն միջազգային չափանիշներին համապատասխանող նոր օրինագծեր: Այդ աշխատանքները կիրականացվեն գործընկեր լրագրողական կազմակերպությունների, ինչպես նաև Ազգային ժողովի պրոֆիլային հանձնաժողովի և ՀՀ արդարադատության նախարարության գործակցությամբ։ Ծրագրի շրջանակներում ԽԱՊԿ-ը կշարունակի դիտարկել իրավիճակը խոսքի ազատության ոլորտում, այդ թվում՝ լրագրողների ու ԶԼՄ-ների իրավունքների խախտումները, և ստացված տվյալների հիման վրա կպատրաստի ու կհրապարակի պարբերական զեկույցներ։ Իրավական մեխանիզմների միջոցով քայլեր կձեռնարկվեն լրագրողների և լրատվամիջոցների իրավունքների պաշտպանության ուղղությամբ։ Կշարունակվի Տեղեկատվական վեճերի խորհրդի գործունեությունը, որը ուսումնասիրում և վերլուծում է ոլորտում ծագող տարբեր կոնֆլիկտային իրավիճակներ, այդ թվում՝ լրատվամիջոցներին վերաբերող դատական ​​գործերը, և ընդունում է փորձագիտական ​​եզրակացություններ։ Այդ փաստաթղթերն ուղարկվում են վեճի կողմերին, հրապարակվում են նաև ՏՎԽ կայքում։