2018թ․ հեղափոխությունից հետո շատերի համար անսպասելի «Ա1+» հեռուստաընկերության հիմնադիրը դիմեց դատարան՝ ընդդեմ Հայաստանի Հանրապետության կառավարության ու Հեռուստատեսության և ռադիոյի հանձնաժողովի։
«Ա1+»-ը եթերազրկվեց 2002թ․-ի ապրիլի 2-ին։ Այսօր հեռուստաընկերության հիմնադիրը պահանջում է առ ոչինչ ճանաչել 2003թ․-ի 7 մրցույթների որոշումները, որոնք Հեռուստատեսության և ռադիոյի ազգային հանձնաժողովը կայացրել էր՝ հեռարձակման լիցենզիա տրամադրելու համար։ Դրանցից ոչ մեկի արդյունքում «Ա1+»-ն արտոնագիր չէր ստացել։
Սա առաջին դեպքը չէ, որ «Ա1+»-ը փորձում է դատական կարգով վերականգնել իր խախտված իրավունքները։ Ընկերությունը հասել է ընդհուպ Մարդու իրավունքների Եվրոպական դատարան, որը դեռևս 2008թ-ին արձանագրել է՝ խախտվել է կարծիք արտահայտելու ազատությունը։
«Ա1+»-ի շահերը Վարչական դատարանում ներկայացնող փաստաբաններից Արա Ղազարյանը բացատրում է՝ ինչու է հիմա կարևոր նման հայց ներկայացնելը․ «Առաջին հերթին «Ա1+»-ին անհրաժեշտ է ռեաբիլիտացում, երկրորդ՝ ընկերությունը ձգտում է վերադառնալ եթեր, երրորդ՝ ունենք անբնական վիճակ․ կա Եվրոպական դատարանի ուժի մեջ մտած վճիռ, որ անօրինականություն է տեղի ունեցել «Ա1+»-ի նկատմամբ և միևնույն ժամանակ առկա են Հայաստանի դատարանների յոթ որոշումները, ըստ որոնց՝ անօրինական որոշում տեղի չի ունեցել։ Չի կարող Եվրոպական դատարանի վճիռ լինել, որ ասում է խախտում է տեղի ունեցել, և նույն գործով ազգային դատարանների վճիռները, որտեղ հակառակն է նշվում»։
Ավելին՝ տեսանյութով
