Խոսքի ազատության պաշտպանության կոմիտեն տեղեկացնում է, որ մեկնարկել է ԶԼՄ-ների պաշտպանության հիմնադրամի ստեղծման գործընթաց, համաձայն որի՝ լրագրողներին և խմբագրություններին տրամադրվելու է անվճար իրավաբանական խորհրդատվություն, ինչպես նաև փաստաբանական աջակցություն տեղեկատվական վեճերի հետ կապված դատական գործերում։
Անվճար փաստաբանական ծառայություններ կտրամադրվեն դատական գործերում ներգրավված այն լրատվամիջոցներին, որոնք համապատասխանում են հետևյալ չափորոշիչներին․
- Կիրառում են մասնագիտական էթիկայի նորմերի վրա հիմնված ինքնակարգավորման որևէ մեխանիզմ,
- Օրենսդրության համաձայն՝ հրապարակում են իրենց ամբողջական ելքային տվյալները, այդ թվում՝ հիմնադիրների մասին տեղեկություններն ու ֆինանսական հաշվետվությունները,
- Կրում են անձնական (խմբագիր) կամ կոլեգիալ պատասխանատվություն հրապարակվող բովանդակության համար։
Նախաձեռնությունն իրականացվում է Հայաստանի մեդիայի զարգացման ծրագրի շրջանակում՝ «Ինտերնյուս» միջազգային կազմակերպության աջակցությամբ, ԱՄՆ Միջազգային զարգացման գործակալության ֆինանսավորմամբ:
ԽԱՊԿ առաքելությունն է ամրապնդել երկրում խոսքի ազատությունը, պաշտպանել լրագրողների և լրատվամիջոցների իրավունքները՝ ճանապարհ հարթելով որակյալ լրագրության տարածման համար։
